падпicка

пошук па архiве

з:
па:

Падзеi

Выстава “Майстры польскага малюнка”

20 ліпеня - 20 верасня 2017Мастацтва
Месца: Мінск, Нацыянальны мастацкі музей Рэспублікі Беларусь,вул. Леніна, 20

Міністэрства культуры Рэспублікі Беларусь
Нацыянальны мастацкі музей Рэспублікі Беларусь
Падляшскі музей у Беластоку
Акружны музей у Сувалках
Польскі Інстытут у Мінску


Выстава
“Майстры польскага малюнка”
са збораў Падляшскага Музея ў Беластоку і Акружнога музея ў Сувалках

адкрыецца 20 ліпеня а 18-ай гадзіне
(уваход на адкрыццё вольны)

Праект рэалізаваны пры фінансавай падтрымцы Маршалкоўскай управы Падляшскага ваяводства ў Беластоку

З 21 ліпеня па 20 верасня 2017 года ў Нацыянальным мастацкім музеі Рэспублікі Беларусь будзе экспанавацца выстава «Майстры польскага малюнка» з калекцыі Падляскага музея ў Беластоку і Акруговага музея ў Сувалках (Рэспубліка Польшча). Выстава арганізавана сумесна з Польскім Інстытутам у Мінску пры падтрымцы Маршалкоўскага Упраўлення Падляскага ваяводства.

Упершыню ў Беларусі будзе прадстаўлена больш за 300 графічных твораў польскіх мастакоў XIX–XX стагоддзяў. Сярод аўтараў – вялікія майстры польскага мастацтва – Юліюш Косак (1824–1899), Ян Матэйка (1838–1893), Міхал Элвіра Андрыёлі (1836–1893), Максіміліян Герымскі (1846–1874), Альфрэд Веруш-Кавальскі (1849–1915), Станіслаў Віткевіч (1851–1915), Лявон Вычулкаўскі (1852–1936), Станіслаў Ігнацы Віткевіч «Віткацы» (1885–1939), Альфонс Карны (1901–1989) і інш. Выставу адрознівае багатая жанравая разнастайнасць экспанатаў. У экспазіцыі прадстаўлены партрэты і карыкатуры, пейзажы і жанравыя замалёўкі, гістарычныя сцэны і фантасмагорыі.

Станіслаў Ігнацы Віткевіч “Віткацы”. 1885–1939. Фантастычны прывід. 1917. Папера, пастэль
З калекцыі Падляшскага музея ў Беластоку

Асаблівай увагі заслугоўваюць тры малюнкі аднаго з найбуйнейшых гістарычных жывапісцаў XIX стагоддзя – Яна Матэйкі, сярод якіх накід кампазіцыі «Прадстаўленне Барбары Радзівіл польскай шляхце»; «Пейзаж» Максіміліяна Герымскага; накіды, эскізы і малюнкі Станіслава Віткевіча і яго сына і вучня, аднаго з самых яркіх прадстаўнікоў мастацтва Другой Рэчы Паспалітай (1918–1939) Станіслава Ігнацы Віткевіча (Віткацы). Значную частку выставы складаюць яркія прыклады карыкатуры, мастацтва якой атрымала асаблівае прызнанне ў XIX стагоддзі. Гэта вострыя па сваіх характарыстыках і вельмі пластычныя ў графічным вырашэнні карыкатуры Чэслава Садоўскага (1902–1959), дабрадушныя шаржы Юзафа Бліхарскага (1886–1941), напоўненыя мяккім гумарам гратэскі Альфрэда Веруш-Кавальскага. На выставе прадстаўлены выдатныя ўзоры жанру партрэта: «Партрэт Станіслава Віткевіча» Антонія Піятроўскага (1853–1924), «Партрэт Людвіка Гераніма Морштына» Людаміра Сляндзіньскага (1889–1980), «Партрэт Аляксандра Мана» Зыгмунта Бадоўскага (1875–1959) (1894) і Густава Пілаці (1874–1931) (1911), а таксама аўтапартрэты Браніслава Вішнеўскага (1866–1939), Тадэвуша Болаза (1910–1992), Чэслава Садоўскага.

Вікенцій Леапольд Сляндзіньскі. 1837–1909. Маладая вясковая маці. 1874. Папера, аловак
З калекцыі Падляшскага музея ў Беластоку

Экспазіцыя выставы не толькі знаёміць з вельмі цікавым матэрыялам – творамі вядомых польскіх мастакоў, але і з’яўляецца прэзентацыяй Падляскага музея ў Беластоку* і Акруговага музея ў Сувалках**, размешчаных у Падляскім ваяводстве, бліжэйшым (разам з Люблінскім) па суседству з Беларуссю.

Станіслаў Віткевіч. 1851–1915. Вёска. Папера, аловак
З калекцыі Падляшскага музея ў Беластоку