падпicка

пошук па архiве

з:
па:

Падзеi

"ЗНАКАМІТЫЯ МІНЧАНЕ ХІХ-ХХ СТСТ."

13 красавiка 2018Гісторыя
Месца: Мінск, Музей "Дом Ваньковічаў. Культура і мастацтва I-й паловы XIX ст." вул. Інтэрнацыянальная, 33А

13 красавіка а 16-ай гадзіне ў Музеі «Дом Ваньковічаў» адбудзецца прэзентацыя серыі зборнікаў «ЗНАКАМІТЫЯ МІНЧАНЕ ХІХ-ХХ СТСТ.» - матэрыялы міжнародных канферэнцый 2004-2016 гадоў, прысвечаных малавядомай гісторыі Мінска.

Сумесныя канферэнцыі беларускіх і польскіх гісторыкаў з 2004 да 2016 года праводзіліся па ініцыятыве Польскага Інстытута ў Мінску і Вроцлаўскага ўніверсітэта, у розныя гады партнёрамі выступалі Таварыства “Wspólnota Polska”, Беларускі дзяржаўны педагагічны ўніверсітэт імя Максіма Танка і БІП – Інстытут правазнаўства. У канферэнцыях прымалі ўдзел прафесійныя гісторыкі – выкладчыкі вышэйшых навучальных устаноў, навуковыя супрацоўнікі архіваў, а таксама маладыя навукоўцы – магістранты, аспіранты, студэнты, для якіх гэтыя сустрэчы сталі стартавай пляцоўкай для ўваходу ў гістарычную навуку. Сустрэчы далі магчымасць абмеркаваць спрэчныя, складаныя і супярэчлівыя праблемы і пытанні агульнай гістарычнай спадчыны з улікам розных трактовак і падыходаў беларускай і польскай гістарычных школ па той ці іншай праблеме.

Юбілей – час падвядзення вынікаў, агляд мінулага і погляд у будучыню. Дзесяць сустрэч беларускіх і польскіх гісторыкаў і дзесяць выданняў матэрыялаў канферэнцый, якія разышліся па прыватных бібліятэках, размясціліся на паліцах дзяржаўных бібліятэк у Польшчы і Беларусі, сталі агульнай гісторыяй абедзвюх краін. Гэта плён працы не толькі гісторыкаў, але і археолагаў, музеяведаў, культуролагаў, філолагаў і літаратараў, даследчыкаў архітэктуры і прадстаўнікоў іншых галін навукі. “Мінск і мінчане” – гэта дзясяткі, калі не сотні прозвішчаў і імёнаў, што былі вернутыя з забыцця і ажылі на старонках зборнікаў матэрыялаў канферэнцый. Менавіта яны сваёй самаахвярнай і нястомнай працай зрабілі Мінск такім, якім мы яго бачым і ўспрымаем сёння.



Уваход на прэзентацыю вольны