падпicка

пошук па архiве

з:
па:

Падзеi

Літаратурна-мастацкая выстава “Крама з цытатамі”

13 лiстапада 2018 - 1 лютага 2019Лiтаратура
Месца: Мінск, Нацыянальная бібліятэка Беларусі, пр. Незалежнасці, 116, галерэя “Ракурс”. 2-гі паверх

 
 
13 лістапада 2018 года а 16-й гадзіне ў рамках праекта “Месяц польскай літаратуры” ў галерэі “Атрыум” Нацыянальнай бібліятэкі Беларусі (пр. Незалежнасці, 116, 3-ці паверх) адкрыецца літаратурна-мастацкая выстава “Крама з цытатамі”.
Арганізатары выстаўкі – Польскі інстытут у Мінску, Нацыянальная бібліятэка Беларусі і праект “Крама з цытатамі” (Познань, Польшча).
 

Выстава ўяўляе сабой 30 цытат знакамітых палякаў у дызайнерскім графічным афармленні, што натуральным чынам дадае да іх літаратурнай вартасці вартасць мастацкую. Аўтаркай і ўвасабляльніцай ідэі з’яўляецца дызайнерка, фатографка і тэатразнаўца Дар’я Мельцажэвіч. Яна захапляецца літаратурай і стварае партрэты вядомых творцаў, а самыя цікавыя іх выказванні размяшчае на прадметах штодзённага ўжытку. І такім чынам заахвочвае чытаць кнігі.

Дар’я Мельцажэвіч вучылася ў Мастацкім універсітэце ў Познані, Вышэйшай школе прыкладной інфарматыкі і кіравання ў Варшаве, Універсітэце імя Адама Міцкевіча ў Познані. Мастачка рэалізавала вялікую колькасць разнастайных графічных і фатаграфічных праектаў, распрацоўвала дызайн кніжных вокладак, была мастацкім рэдактарам навуковага часопіса. Лаўрэатка мастацкіх узнагарод, неаднаразова прымала ўдзел у індывідуальных і калектыўных выставах у Польшчы і за мяжой.

Плакаты з партрэтамі, створаныя Дар’яй Мельцажэвіч, стала знаходзяцца ў галерэі “Крамы з цытатамі” ў Познані. У краме можна набыць не толькі плакат з абраным дызайнам, але таксама цішоткі, кубкі, торбы, шэзлонгі, падушкі і іншыя рэчы з цытатамі.
 
 

Крама выдатна ўпісалася ў культурную тканку Познані, але яе дыяпазон значна шырэйшы: праекты “Крамы з цытатамі” з’яўляюцца на сайтах розных выдавецтваў, крама трапіла ў спіс дзесяці незвычайных крамаў свету і знаходзіцца ў топе спісу месцаў, якія варта наведаць у Познані (згодна з рэйтынгам часопіса “Падарожжы”); праект нават стаў аб’ектам даследавання на літаратуразнаўчай канферэнцыі, прысвечанай памежжам літаратуры. Крама супрацоўнічае з буйным міждысцыплінарным фестывалем “Мальта”, рэалізуючы адну са сваіх сацыяльных ініцыятыў: у межах фестывалю на Плошчы Свабоды ў Познані адбыліся публічныя чытанні рамана “Транс-Атлантык” Вітальда Гамбровіча – ад першай старонкі да апошняй. Мэта праекта – папулярызацыя чытання, і ён будзе працягвацца ўжо з іншымі творамі.

Ідэяй, якой ад самага пачатку кіраваліся стваральнікі крамы, была культуратворчасць. Заснавальнікі крамы спадзяюцца, што праект дае культуры больш чытачоў і робіць іх больш чулымі да слова. Таму галерэя складаецца, у асноўным, з літаратурных (але не выключна польскіх) цытат. На мінскай выставе Вас чакаюць Ян Каханоўскі, Адам Міцкевіч, Генрык Сянкевіч, Марыя Канапніцкая, Марыя Складоўская-Кюры, Вітальд Гамбровіч, Бруна Шульц, Юльян Тувім, Канстынты Ільдэфанс Галчыньскі, Станіслаў Лем, Эдвард Стахура і іншыя.
 
Цытата ўтрымлівае ў сабе сутнасць у такой кароткай, згушчанай форме, якая лёгка можа заінтрыгаваць і захапіць. Магчыма, усім вядомы Міцкевіч у новым графічным абліччы, на цішотцы ці кубку, загучыць у абсалютна новым кантэксце?
 
У Мінску выстава суправаджаецца падборкай арыгінальных перакладаў польскай літаратуры. І гэта стварае прадстаўнічы агляд даробку беларускай перакладчыцкай школы, якая годна адказвае на выклік класікі і сучаснасці польскай літаратуры.